الجمعة، 18 ديسمبر 2009

مادة طبيعية لرفع مستوى المزاج




أول مرة شفتها معرفش حصلي إيه؟! في كده في الدنيا؟! ...يااااه كأني كنت ماشية في صحراء وتايهه بقالي سنين ومرة واحدة لقيت قدامي طريق أخضر و صوت عصافير واحساس بالنسيم بيتخلل كل جزء في جسمي ، كنت بردانه ومرة واحدة حسيت بكل الدفىء اللي في الدنيا
شفت الدنيا مليانة ورود ونقاء وبراءة ، يااه لما تحس مرة واحدة إن الحياة جميلة بلا هموم واني ملكت الدنيا وما فيها ، عرفت إن أنا في نعمة كبيرة قوي ولازم أحمد ربنا عليها كل ثانية في كل يوم .. من يوم ما جربتها ، أدمنتها و بقيت أنتهز أي فرصه عشان أشوف ضحكتك اللي بتملى عليا الدنيا ،وقتها عرفت إن لو الجنة تحت أقدام الأمهات في الآخرة فدي جنة الأمهات في الدنيا.

لكن إيه سرها؟

قرأت موضوع عن بحث نشر في مجلة طب الأطفال، الصادرة عن الأكاديمية الأميركية لطب الأطفال قال إن ابتسامة الطفل لها تأثير السحر على الأم لأنها تساعد على تنشيط مركز المكافأة في المخ.

البحث تم بعمل تجربة على 28 أم وعرض عليهن صور لتعبيرات متنوعة لوجوه أطفال من بينها أطفالهن وقام العلماء أثناء التجربة بمراقبة تدفق الدم في مخ الأمهات بمساعدة أشعة الرنين المغناطيسي، وأظهرت نتيجتها أن نظرة الأم لصورة طفلها وهو يبتسم تنشط مراكز المكافأة في المخ بشكل ملحوظ وهذا المراكز أو المناطق في مخ الإنسان هي المسئولة عن انتاج مادة الدوبامين والتي تتحكم في مزاج الإنسان.

وكشفت التجربة أيضا ،أن ابتسامة الابن تؤثرعلى الأم بشكل أكبر من ابتسامة أي طفل آخر وكلما كانت ابتسامات الطفل أقوى وأطول زادت درجة النشاط في مناطق السعادة

الطريف إن المناطق الدماغية تلك هي نفس المناطق التي تتفاعل بالنشوة لدى مُدمني المخدرات. وهو ما جعل الباحثين يقولون إن رؤية ابتسامة الطفل هو أشبه بالمادة الطبيعية لرفع مستوى المزاج.

.

هناك 6 تعليقات:

  1. الله .... حلوه اوى البحث ده
    وحلو اوووووووووى الاحساس ده
    ربنا يديمه عليكى ويخلى عمر يارب
    ونفرح بيه كده
    و .. احم احم .. عقبالى :$:$

    ردحذف
  2. عقباااااااااااالك لأنك هتبقى احلى أم ودي بجد احلى حاجة في الدنيا

    ردحذف
  3. طيب ما فيش بحث للرجالة

    يعني هما مثلا بيتخنوا لما اولادهم بيضحكوا !!

    المونة مختلفة

    ردحذف
  4. طبعا معلومة تحفة وجديدة... ولازم نقول سبحان الله بجد...
    بس بعيد عن المعلومة الجميلة دي... من يوم ما لفت نظري البلوج " بقيت ماما " على البروفايل عندك، كل يوم أقول هدخل أتفرج... ومسئولياتي كست بيت وحيدة فالبيت مع بابا كانت بتشغلني وأنسى إني أدخل أشوفه.
    بس النهاردة قررت أدخل... قرار نهائي...
    مش عارفة أوصفلك أد إي وأنا بقرى كلامك إني - والله - مع كل كلمة كنت بحس إني جسمي بيقشعر من روعة الإحساس، سواء إحساسك الجميل جدا من وإنتي بتوصفي حبك لحد جواكي وبتكلميه لغاية ما بتوصفي هو إزاي جه للدنيا.
    طبيعي جدا حب الأم لطفلها، بس الرائع فيكي إنك بتعملي معنى وطعم مختلف جدا لحبك لابنك، ومن أحلى الكلام اللي قلتيه إنك مش عاوزاه كمالة عدد، إنتي إنسانة رائعة وبحبك وبحب طريقتك... طريقتك في كل حاجة، من 4 سنين وإنتي ليكي طريقة مختلفة... ناجحة... مميزة... مختلفة.
    بعد ما قريت كلامك حاسة بابتسامة داخلية مرسومة جوايا، وبتدعي ربنا من كل قلبها ربنا يحميكي ويحفظ عمر ويخليلك محمد.
    بحبك يا أروع مامي.
    ميناس خطاب.

    ردحذف
  5. معتز
    تصدق عندك حق
    محمد جوزي برضة سألني نفس السؤال هعمل بحث واقولك
    شكرا نورتني

    ردحذف
  6. اييييييييييه الكلام الكبير ده يا ميناس مش قادرة اقولك قد ايه مبسوطة بكلامك
    تجربة الامومة دي بجد ممتعه يمكن انا مكتبتش لسه حاجات كتير المفروض اكتبها عشان مسئولياتي كأم برضه :) ربنا يخليكي ليا يا حبيبتي وعقبال ماتعيشي نفس التجربة
    بحبك يا اروع اخت في الدنيا  

    ردحذف