الأربعاء، 1 يوليو 2009

بقيت أم


من 8 شهور عرفت انك هتيجي ..مشاعري ساعتها ؟! صعب قوي أوصفها ضحكت ، علامات ذهول، اتخضيت ..إيه د ه ده بجد ؟! هو ينفع يعني ؟!
لأ متزعلش اوعى تفتكر اني مش فرحانة، أو مش مستنياك .. خايفة بس غصب عني ..حاسه انها مسئولية كبيرة قوي عليا ..معرفش لسه هكون قدها ولا لأ؟ ..حاسه اني محتاجة أظبط حاجات كتير قوي فيا عشان أكون مستعدة اني اشوفك ويكون ليا تأثير في حياتك.
محتاجه أفهم حاجات كتير حواليا ، أبقى أقوي ، اتحكم في مشاعري، محتاجه ابقى أنجح منا عايزاك تبقى فخور بيا.
كل يوم وميعاد لقانا بيقرب وانا لسه مش مستوعبة ..حتى وانت كل يوم بتأكد وجودك جوايا ، بحس بيك وكأنك بتقولي أنا خلاص جاي لازم تستعدي.
عارف انهاردة انا كنت في المكتبه جبت كتب كتير عشان أعرف اتعامل معاك صح ، عايزة علاقتنا متكونش عادية ..عايزة ابنيها صح ..عايزه ..... مش عارفة انا عايزه ايه ..متزعلش .. مش مستوعبة ...
انا خايفة قوي ..متقلقش ده مش ضعف ..بس صدقني دي مسئولية كبيرة قوي..مش عايزاك تبقى كمالة عدد..عايزاك تبقى اضافه للدنيا دي وأنا أكون اضافة لحياتك مش مجرد واحدة مفروضة عليك بحكم الطبيعة البشرية ..
مش عارفة حياتي هتبقى عاملة ازاي لما تيجي ..اقولك على سر ..اصلي بحب شغلي قوي بس متأكده اني مش هحبه أكتر منك ..وعندى طموحات كبيرة قوي معرفش هتساعدني احققها ولا لأ ..
وبعدين عايزة أقولك على سر كمان ..انت مش الأول في حياتي ..هو أكيد بيحبك ..بس تصدق ساعات كتير بحس انه بيغير منك ..معذور؟ هو حاسس انك هتاخدني منه ..أو أخدتني بالفعل ..
بس تعرف..نفسي أشوفك ..ياترى شكلك إيه ؟ نفسي تبقى شبهه ..تبقى نسخة طبق الأصل ..في شكله وفي طباعه ..نفسي اشوف ضحكتك وتنور عليا الدنيا ..أكيد هحبك مانت هدية من ربنا ..هدية غالية قوي ...هحاول أحافظ عليها ..وأوعدك
مش هكون أم عادية
.

هناك 7 تعليقات:

  1. وأنا أول تعليق

    والف مبروك وبجد فعلا مامته هتبقا أم مش عاديه

    ردحذف
  2. مبرووووووووووووووووووووووووووووووووووووووك

    وان شاء الله هتبقى أحلى أم فى الدنيا

    ردحذف
  3. ألف ألف ألف مبروووك يامروة
    وعقبال ما ينور الدنيا بألف سلامة
    وانا كمان متأكدة انك مش هتبقى أم عادية بإذن الله
    :)

    ردحذف
  4. يجي بالسلامة إن شاء الله.. ربناي بارك لك فيه ويبارك فيكي ليه

    ردحذف
  5. كلماتك مليانه بالمشاعر

    ربنا يخلهولك

    مصطفى عبد الرحيم

    ردحذف
  6. محمد
    الله يبارك فيك ويلا عقبالك وادعيلي اكون ام كويسة

    بوس بوس
    ربنا يخليكي نورتيني :)

    رنا
    شكرا يا رنون وعقبالك


    حسام
    ربنا يخليك ودعواتك على طول

    مصطفى

    شكرا يادرش
    ربنا يخليك

    ردحذف
  7. انت عمرك ماهتكونى ام عادية
    لانك اصلا مش حد عادى
    ربنا يحميكى ويحميه ويخليكم لبعض
    واهو نور دنيتك واكيد انت اد مسؤوليتك
    الف مبروووك ياجمل ماما فى الدنيا

    ردحذف